السبت، 25 أبريل 2009

موال الدموع........ عاوز حد يا ناس دمعته يبيعالى



حاولت ابكى لقيت البكا غالى


أصله غلا دلوقتى وبقه سور عالى


روحت اشتريت دمعة


أبكى بيها على حالى


دمعة تنسينى موالى


اللى بعهالى احتاجها


تانى يوم جالى


خد من عمرى سنة


ودمعتى أدهالى


أحتياجى لدموعى تسوى


كل ثروتى ومالى


عاوز حد يا ناس دمعته يبيعالى


اصل دموعى خلصت


من كتر وجع الليالى

هناك 29 تعليقًا:

  1. الحاجه الوحيدة اللي مش يتخلص هيا الدموع


    قول يارب

    ردحذف
  2. عزيزتى
    كيارا

    مين قالك انها مش بتخلص

    لما الواحد يبكى على حاجات كتير

    ويزهق من البكاء عليها

    ويقرر عدم البكاء عليها

    بس الحاجه دى بتوجعه ودموعه مش عاوزه تنزل

    ساعتها يتمنى دمعة تنزل مش عاوزه تنزل

    يارب......................................................................................................................................................................................

    تحياتى

    سلام

    ردحذف
  3. الكلام حلو فعلا .. وحقيقى تعجبت من فرط المشاعر لأنى تخيلتك انسان قاسى يستسهل جرح الآخرين والسخرية منهم لا لشىء الا لأنهم يخالفونه فى الرأى

    تحية منى لكلماتك التى تدل على ان هناك بداخلك احساس لسة حى فعلا

    أما بخصوص تعليقك فى مدونتى فمش عارفة هو ايه اللى انا مردتش عليه؟؟؟ هل تقصد حاجة معينة؟؟ أو حد معين؟؟ يعنى فين التجاهل اللى انت بتقول عليه دة؟؟

    ايه هو الإستفسار اللى ما جاوبتش عليه ومين هو الشخص اللى انا تجاهلته؟؟

    ردحذف
  4. عزيزتى
    أسور

    شكرا على كلامك الحمد الله عجبك

    ومش عارف ليه تعجبتى من فرط مشاعرى

    احساس الانسان ملهاش دعوى بارائه ومعتقداته

    المشاعر قريبه من القلب الاراء بيحركها العقل والقلب

    وانا بقول راى بحرية وصراحة بدون مجامله ويمكن ساعات بستخدم السخرية مع ناس لان فى كلام بيدعوا الى السخرية


    ومعاكى تقريبا عمرى ما سخرت بس بناقشك باحترام لان انتى كمان بتحورينى باحترام


    والحمد الله عرفتى ان عندى قلب واحساس

    اما موضوع تعليقى عندك هروح دلوقتى هناك اوضحلك ايه اقصده

    نورتينى

    سلام

    ردحذف
  5. انا هقولك اللى حصل بالظبط رغم انى قلته بالفعل
    انا مش عارفة همة اخدوا براءة ليه بشكل شخصى لكن فى المحكمة رحنا انا والمحامى وكان اتنين محامين للولاد موجودين
    رقم العربية فى المحضر كان 322607
    فجأة وبقدرة قادر اصبح 3220607 فاصبحت 7 ارقام ومفيش عربية 7 ارقام .. وبالتالى اتلغى كدليل
    التوقيت بتاع المحضر كان مكتوب انه 12.30 ودة طبعاوقت توقيت كتابة المحضر والواقعة كانت الساعة 9 مساءا وعلى ما اتصلت بالنجدة وجم ورحنا القسم وقعدنا قد كدة نستنى اهالى الولاد لحد ما عملنا المحضر فاتكتب 12.30 بالليل وبالتالى محامين الخصوم قالوا ان الواقعة حصلت اثناء سير المدعية اللى هى انا الساعة 12.30 بعد منتصف الليل وكدة تعارض مع كلامى انى كنت رايحة عزاء
    على ان مفيش حد بيروح عزا الساعة 12.30 باليل
    كما انكر الولاد الواقعة طبعا ..
    وتحريات المباحث قالت انه ثبت من التحريات حدوث مشاجرة لم تعرف اسبابها
    مقدمين ورق ان الولد فى كلية هندسة جامعة القاهرة رغم انه اترفد منها لأنه سقط سنتين وهو الآن فى مودرن اكاديمى
    فقدمنا طلب للمحكمة بسماع اقول الشهود اللى همة بنت اختى اللى كانت معايا ساعة الواقعة والظابط اللى جه وظبطهم متلبسين .. وكمان طلبنا التأجيل لحين تقديم اوراق تثبت ما جاء فى المحضر
    وفى نهاية المداولة فوجئنا بالقاضى بيصدر الحكم بالبراءة وقال فى حيثيات الحكم انه لعدم كفاية الأدلة ولحداثة سن المتهمين وحرصا على مستقبلهم
    بس خلاص .. هى دى كل الحكاية

    ردحذف
  6. عزيزتى
    أسوووور

    كده الامور وضحت وفهمت
    بس هو كده مفيش اى اجراء ممكن تعمليه

    ولا بعد الحكم انتهى كل شئ

    معلش انا مليش فى اجراءات القانون

    واخر حاجه

    ده درس لظلم القانون فى مصر اللى ممكن يسجن برئ فيه ويطلع مدان براءة بسبب تلاعب فى الاجراءات او خطأ فيها


    وحقك مش هيضيع لان ربنا بيخدبنا حقنا سواء فى الدنيا او الاخرة اطمنى

    شكرا على اهتمامك

    دايمن بخير يا رب

    سلام

    ردحذف
  7. ما شاء الله بجد
    احلى ما فية انه عامى اوى وجميل فعلا.البكاء فعلا شىء مش هين خالص على حد خصوصا لو كانت نفسة عزيزة علية
    شكرا على البوست الجميل
    سلام

    ردحذف
  8. مشاعرك واحساسك عالي جدا

    وكلماتك قووووية

    انا برتاح اوووي لما ببكي واصعب حاجة لما منقدرش نبكي ونلاقي دموعنا اتحبست جوانا

    احساس مؤلم جداااا

    ربي يسعد ايامك ويبعد عنك الاحزان

    دمت بحفظ الرحمن

    ردحذف
  9. عارف
    فى ليله قولت فيها جمله
    قولت لانسان
    خلى بالك من دموعى يجى يوم ومتنزلش هاتبقي الحياه وقتها صعب معاك
    وفعلا دا حقيقي
    دلوقت اوقات كتير بتمنى دموعى تنزل مابتنزلش
    تفتكر اية لية احنا دموعنا مابتنزلش؟
    هل من كتر القسيه فعلا؟

    ردحذف
  10. السلام عليكم
    كلام جميل وكلة احساس ربنا يباركلك

    ردحذف
  11. عزيزى
    Hossam

    اكيد لازم يكون عامى هو احساسى هيكون ايه الا بلغتى وطريقتى وانا مش شاعر

    والبكاء ده شئ كبير بس الناس مش عارف قيمته

    شكرا على كلامك

    تبعلى دمعة بقه

    سلااام

    ردحذف
  12. عزيزتى
    ঔღঔ نـــوارة ঔღঔ

    شكرا يا افندم هو اللى من القلب بيكون صادق والصدق قوة وجميل

    وانا برتاح اوى لما ببكى

    بس لما ابكى مش شئ واحد بيوجعى البكا وبزهق منه

    واحساس بيكون مؤلم بجد

    شكرا على دعوتك وربنا يكرمك

    نورتينى

    سلام

    ردحذف
  13. ع8زيزتى
    ladypalace

    اكيد الدموع بتخفف الحياه وبتريحنا

    ولما شئ يوجعنا ونبكى

    ويرجع تانى يوجعنا ونبكى

    وتالت ورابع

    خلاص البكا مش هينفع

    حتى لو جينا نبكى مش هنعرف نبكى

    ربنا يهدى الجميع ويريح قلبنا

    تحياتى

    سلام

    ردحذف
  14. غير معرف

    شكرا يا افندم

    واتمنا اللى اكتبه كله يعجبك

    تحياتى

    سلام

    ردحذف
  15. ياه حزينه اوى اوى مهو الدمع لما يجف خلاص يبقه الحزن وصل لاعلى درجاته


    تقبل مرورى

    ردحذف
  16. ايه التشائم الفظيع ده
    بجد انا زعلان وحزين لانك زعلانة
    ده المدونة اسمها احساس لسة حى والمفروض الاحساس يكون للضحك والجمال والطبيعة مش للدموع والالم
    اتمنى تكونى كويسة
    تحياتى صديقتى

    ردحذف
  17. أزال المؤلف هذا التعليق.

    ردحذف
  18. والله اكتر حاجة عندنا كبشر هي الدموع
    لو العين مش هتبكي القلب اكيد بيبكي
    وبكا القلب اقوى من بكا الف عين


    تحياتي

    ردحذف
  19. عزيزتى
    ماء تشرين

    اه حزينه اوى لان الدموع رمز للحزن

    واكيد جفاف الدمع مش انتهاء الالم

    ده كتر الالم بيجفف الدمع

    نورتينى

    سلام

    ردحذف
  20. عزيزى
    Hossam

    انا تهبت معاك يا حسام ومش عارف اعلق عليك اروح عندك اقولك انا ذكر مش انثى

    وهنا اقولك كده

    طيب اعمل ايه

    يا ريت تاخد بالك بقه

    وهروح مدونتك اسيب التعليق

    اقرى التعليقات كلها يا حسام دايمن

    تحياتى

    سلام

    ردحذف
  21. السلام عليكم
    ايه دا كل دا حزززززززن
    يا نهار ابيض
    الدنيا متستاهلش كل دا
    افرح وخلي الهم لاصحاب الهموم
    احنا صحاب الهمه واملنا يدوووووووووم
    بجد طريقتك في الكتابه جميله اووي
    لكن لو كانت فرحه كانت هتبقي اجمل
    تحياتي
    في رعاية الله
    السلام عليكم

    ردحذف
  22. تحياتى حضرتك رائع
    اولا جميله جدا
    بس حاول يكون فى دموع اللى زيك يفرح بنفسه
    ثانيا اللى حاصل مع الكائنه اللى الواحد مش عايز يقول اسمها
    انا معاك وفى كام حد معانا اذا حبيت نعمل اي حاجه احنا معاك
    ربنا يعزك رغم انك احسن من اى حد فينا وربنا يهدى

    ردحذف
  23. عزيزتى
    نور الاسلام

    ما علشان نحس بالفرحة لازم نحس بالحزن واللى ميعرفش يحزن مش هيعرف يفرح

    واكيد الفرحة موجودة والفرحة اجمل

    ربنا يخليكى ويحفظك

    نورتينى

    سلام

    وبكتبلها ولا يهمك يا افندم

    ردحذف
  24. عزيزتى
    GiGi worled

    اكيد كلنا بنحزن ونفرح

    وانا بحاول اخرج ده بكلام كويس

    اما عن موضوع اللى متتسماش

    فانا بحاول اوضح لناس حقيقتها دايمن فى مدونة انا مش موافق

    وشكرا على كلامك الجميل

    اكيد انا مش احسن من اى حد

    كلنا بنغلط وبنعمل حاجات وحشة كتير

    بس المهم نحاول ما نتماداش فى الغلط ده

    ونستغفر ربنا

    ويكون لينا حدود حتى لما نغلط

    نورتينى وشكرا اوى على كلامك اللى كتير منه مستحقهوش

    سلام

    ردحذف
  25. أخى الكريم مع تعليقى الأول

    تعجبنى كلماتك ولكن هناك من يتمنى أن تنتهى دمعاته التى تتساقط دائما وعلى أهون الأسباب تتساقط وتحرق فؤاده
    بيتهيألى الدموع ما بتخلصش دى بتكتر أو جايز الله أعلم لانها كتيره قوى فى دنيتنا
    ممكن مع الأيام تقل بس هى الدنيا كده دخلناها نبكى وسنخرج منها يبكوا علينا
    المهم دموعنا تنزل فى الدنيا قد تكون تخفيفا من ألم أو ذنوب بدلا ما تنزل يوم لا تنفع الدموع

    تحياتى

    ردحذف
  26. الدمع فعلا غالى
    والمفروض ما ينزل الا على الغالى بردوا

    اعتقد انه ما يرخص ابدا الا مع الناس المزيفه
    اللى بتستخدمه كدموع التماسيح

    والفرق بين الاتنين يحتاج فقط احساس صادق ونفس شفافه

    حسام كلماتك جميله فعلا
    سعدت جدا بزيارتى ومعذره على التأخير
    دمت بكل الخير

    ردحذف
  27. عزيزتى
    سمسمه

    اهلا بيكى فى اول تعليق ويا رب دايمن تنورينى

    اه معاك حق قليل من الناس الذين تتساقط دموعهم على اهون الاسباب لاكن مش هيجى فى يوم وتخنقهم تلك الدموع

    ما الدموع مش بتخلص بس كترها بيموتها ويخليها متطلع ولو طلعت تكون ميته مش دموع حية

    والاكيد الدموع اللى تنزل فى دنيتنا لازم يكون ليه فايدة وتلهمنا الراحة والهداية والصبر

    وربنا يرحمنا دنيا واخرة

    نورتينى

    سلام

    ردحذف
  28. عزيزتى
    بسنت

    اكيد الدمع غالى ويستحقها الغالى

    بس مش دايمن اللى بنشوفه غالى بيكون غالى

    ودموع التماسيح دى محتاجه اللى يحس بيها ويعرف ويفهم زيفها

    شكرا على كلامك

    وانا اسعد بزيارتك ورائيك

    ولكل انسان ظروفه ولا داعى للاسف

    فعذرك عذر كل انسان فى الحياه

    وهى دايرة الحياه ومشاكلها

    وربنا يجعلك بخير دايمن

    تحياتى

    سلام

    ردحذف
  29. مرحبا
    يسر اسرة تدوينة دوت كوم بابداء اعجابها الشديد بمدوناتك ونرجو منك مراسلتنا على الايميل:
    Tadwina@gmail.com
    لوضع البانر الخاص بنا على البلوج خاصتكم حتى يتمكن القراء والمدونين في مصر بمتابعة تدويناتكم المستحدثة
    مع خالص الشكر،،،
    فريق عمل تدوينة دوت كوم
    www.tadwina.com

    ردحذف

جربت اطير بجناحى مطيرنيش


قولت اقصه قلبى مطوعنيش



فضلت عايش يا خسارة بجناح ميت



والقلب حى نفسه مره يطير ويعيش

يا......... عالم

;

مدوناتى واللى فيها أتفضلوا (حسام)